मुंबई/म्हैसूर, २२ डिसेंबर २०२५ – खाद्यतंत्रज्ञान क्षेत्रातील ज्येष्ठ तज्ज्ञ आणि पहिल्या पिढीचे यशस्वी उद्योजक डॉ. उमेश मुंजाजी कांबळे यांची असोसिएशन ऑफ फूड सायंटिस्ट्स अँड टेक्नॉलॉजिस्ट्स (इंडिया) – AFSTI च्या राष्ट्रीय उपाध्यक्षपदी निवड झाली आहे.
AFSTI ही भारतातील खाद्यविज्ञान आणि तंत्रज्ञान क्षेत्रातील सर्वात मोठी व्यावसायिक संस्था असून देशभरात ५,००० हून अधिक सदस्य आहेत. ही निवड डॉ. कांबळे यांच्या गेल्या अनेक वर्षांच्या योगदानाची आणि नेतृत्वाची पोहोचपावती मानली जात आहे.
या महत्त्वपूर्ण निवडीबाबत प्रतिक्रिया देताना डॉ. उमेश कांबळे म्हणाले, “ही नवीन जबाबदारी आणि मोठे उद्दिष्ट आहे. मी AFSTI च्या या शक्तिशाली व्यासपीठावरून भारतातील खाद्यसुरक्षा व्यवस्था, एमएसएमई, ग्रामीण अर्थव्यवस्था आणि शाश्वत कृषी-खाद्य पद्धती अधिक बळकट करण्यासाठी प्रयत्न करेन.
स्टुडंट स्टार्टअप्सना प्रोत्साहन देऊन अॅग्री-फूड टेकमध्ये नाविन्य आणि उद्योजकता वाढवणे, उद्योग-शिक्षण क्षेत्रातील दरी कमी करणे, ज्ञानवाटप, मेंटरशिप आणि संयुक्त संशोधन यांना चालना देणे, हे माझे मुख्य उद्दिष्ट राहील. माझ्या प्रवासावर विश्वास ठेवणाऱ्या सर्वांचे मनापासून आभार.”
डॉ. कांबळे हे यापूर्वी AFSTI मुंबई चॅप्टरचे माजी अध्यक्ष राहिले असून सध्या ते असोचॅम महाराष्ट्र राज्य विकास परिषदेचे अध्यक्ष आहेत. खाद्यतंत्रज्ञान क्षेत्रातील २१ वर्षांच्या अनुभवासह ते F2F Corporate Consultants Pvt Ltd चे संस्थापक आणि मेंटर आहेत. २०२३ मध्ये त्यांना AFSTI-FSSAI राष्ट्रीय पुरस्काराने सन्मानित करण्यात आले होते.
खाद्यप्रक्रिया उद्योग, स्टार्टअप्स आणि शैक्षणिक क्षेत्रातून डॉ. उमेश कांबळे यांचे मोठ्या उत्साहात अभिनंदन होत आहे. ही निवड AFSTI ला नव्या उंचीवर नेऊन भारताच्या खाद्यविज्ञान क्षेत्राला अधिक सक्षम करेल, असा विश्वास व्यक्त केला जात आहे.